Vor- un Achterstraat

Disse afsonnerlichen Namens fallt jeden op, de dörch Horn spazeern geiht oder na Horn vertrecken deit. Wo „vor" un wo „achter"? ward denn fraagt. Beide Straten fangt in Horn an un loopt öber l km lang na'n Kohgraben to, dörch dat flache Wischland hendörch, jümmer blangen enanner her, „parallel" heet dat in de Geometrie. Op de Kämpe dartwischen graast de Köh, aber de kiekt bold mit den Kopp, bold mit den Steert na de een oder de anner Straat; na jem hebbt de Straten ären Namen säker nich krägen.

Aber wi wollt mal de Vorstraten lang gahn, denn kriegt wi dat sachs klar, wo dat Geheemnis stäken deit.

Vun de Vorstraten hört de ene Siet, de na't Noorn to, an de Landgemeende Leesterdiek, de Südsiet aber na Horn, also an de Stadt Bremen. Vor 50 Jahrn weer de Vorstraten noch en reinen Landweg, de in de Wischen gung un denn to Enn' weer, wat se jo ook hüte noch deit. Heel eensam weer dat an disse öle Landstraat, denn dar stunnen nich mehr äs veer Hüser; dat weern de Buernhüser vun Kaemena (dar is Sine Wessels in baren un tagen), vun Meier (dat 1929 afbrennt is), vun Notrodt (hüte Garms) un dat grote ole Afnehmerhuus vun Good Riensbarg,  wat tolest „Wachsbleiche“ heten hett, dat ollste vun alle Hüser in Horn, nu leider afbraken. Up de ganze Nordersiet weern nix as Veehweiden, all indeelt in Kämpe, de bit ganz na'n Leester Diek recken dän. Se harrn den Namen Vorkämpe (darna hett de Vorkampsweg sinen Namen, de domals aber noch nich dar weer). Nich een Hus stunn domals dar up disse Nordersiet vun'r Vorstraten. De vier Buernhüser legen mit äre Infahrt na de Vorstraten to. Wenn de Ackerwagens un annere Spannwarken ut de Grootdör un ober den Hoffplatz utfahren dän, denn legen de Kämpe „vor" jem. Un darum heet de Landweg „Vorstraat". Na achtern rut leeg nich väl Land, dar weern de Gaarns un dat Grasland för de Pär. Dit Land „achter" de Hüser reck bit na enen Feldweg, den se eenfach as „Achterstraat" betekent harrn. Un dissen Namen hett he vandage noch. Un dormit hebbt wi dat Namensradels löst!

Eer de Hamborger Bahn in de 70er Jahrn boot word, weren Vor- un Achterstraat mitenanner dörch den „Helmer" verbunnen, de in de Riensbarger Straat rin-lopen da; Helmer bedüd't soväl as Nebenweg. De Helmer leep dar, wo hüte de südliche Deel vun de Weyerbargstraat lopen deit, is aber nu al lang uphaben un vergäten worden, wiel de Hamborger Bahn em merden dörchsniden dä. Egens harr de Weyerbargstraat darum den Namen „Up den Helmer" krigen mußt; dat Katasteramt harr aber Angst, dat konn to licht mit den Halmerweg in Gröpeln verwesselt weern, un is darum nich up dissen Vörslagg ingahn.

 

Nach G. Dehning: Utkiek na Horn, Kiek in de Welt, Niederdeutsches Monatsblatt, III. Jhrg. Nr. 3, 1.3.1955  

DRUCKEN   |   FENSTER SCHLIESSEN